Sa Sardigna

In Sardigna, in su tempus coladu, sa zente fiat pobera meda e dinare pro comporare giogos a sos pitzinnos non nde teniat. Tando sos giogos los faghiant cun sos materiales chi teniant, isvilupande sa fantasia e sa manualidade.

Sos pitzinnos imitaiant a sos mannos, esertzitandesi cun su giogu a praticare sas atividades chi sa vida de assora richiediat: sas fèminas giogaiant a fagher sas meres de domo, a ninnare pitzinnos, a fagher casu e a cogher pane; sos òmines faghiant giogos de balentia, chircande de si fagher fortes e abiles.

Ogni cosa podiat serbire comente giogu, e pro giogos diferentes: unu pungiu de lande podiat èssere proietile pro sa gherra, bardofuledda, masone de bacas o muntone de pedra pro tuponare unu niu de fromiga. Faghindeli un’istampa e poninde.nche a intro unu frustigu unu lande podiat esser fintzas una pipa, e tando su pitzinnu chi si lu poniat in buca comintzaiat a imitare a sos betzos, topigande e brigande a sos àteros pitzinnos chi fiant burdellende.

Ma in antigu sos pitzinnos si faghiant òmines in pagos annos: a oto-noe annos comintzaiant a traballare paris cun sos genitores, pro su pagu chi podiant fàghere: sas fèminas tentaiant a sos frades minores e faghiant su gustu cando sa mama nche fiat in campagna, sos òmines andaiant a campagna paris cun su babbu, e a bortas nche colaiant meses intreos chena torrare a bidda, tentende su bistiàmene.