Pàzina Base

Su giogu in s'istòria

Sa Sardigna


Sos pitzinnos in su mundu de eris

Giogos antigos


Giogos de abilidade


Contos

Sos pitzinnos in su mundu de eris


Finas a vint’annos como in sas biddas sos pitzinnos minores nche colaiant su prus de sa die in sa carrera, gioghende e currende.

Su pitzinnu no ‘aparteniat’ a su babbu e a sa mama ebia, ma fiat de tota sa bidda, e in ogni carrera b’aiat ogros chi lu tentaiant e gente chi fiat pronta a li ghetare sa manu si b’aiat perìgulu o a lu brigare si faghiat dannu.

Su pitzinnu fiat siguru, si moviat lìberu in ogni carrera, faghiat sos cumandos a totu sos de su bighinadu e podiat intrare in ogni domo, fintzas in cussas de sos inimigos de sa famìlia.

Cando sos balores antigos de sa bidda traditzionale ant lassadu su campu lìberu a una ‘modernidade’ interpretada comente ‘autoreferentzialidade’, sa bidda no est pàrsida prus unu prolungamentu de sa domo ma unu mundu estràneu, e sa bida est cambiada.

Oe sos pitzinnos nche colant su prus de su tempus o paris cun sos adultos (chi lis organizant su tempus e, a dolu mannu, sos giogos) o in antis de sa televisione.

Paret chi su giogu ispontàneu de su pitzinnu siat tempus pèrdidu, e chi su mundu cherzat connotu, interpretadu e analizadu dae pitzinnia, chena lassare campu a sa fantasia e sa creatividade.

Ma fortzis sos giogos pòberos de una borta prenaiant su mundu de sos pitzinnos de isperantzia e de bisiones, e a nche lis furare custas cosas est a lis lassare unu boidu chi sa tecnologia moderna no at a poder mai prenare.