Pàzina Base

Su giogu in s'istòria

Sa Sardigna


Sos pitzinnos in su mundu de eris

Giogos antigos


Giogos de abilidade


Contos
Su giogu in s’istoria       

In sos libros non b’est iscritu, ma sos pitzinnos si sunt agatados semper, fintzas in su tempus de sa Rivolutzione Frantzese, fintzas in su tempus de sos Romanos e de sos Grecos, fintzas in sa preistoria. Dae cando est nàschidu su mundu sos pitzinnos si sunt agatados semper, e custos pitzinnos giogaiant!

Dae sos repertos archeològicos ischimus chi sos giogos primitivos rapresentaiant armas e arados, e custu est normale ca sos pitzinnos ant semper imitadu a sos mannos, chi assora biviant de catza e de agricoltura.

In sas grutas de Isturitz, in Frantza, b’ant àpidu unu animaleddu de ossu chi paret unu felinu, e s’est pòdidu pensare chi est su giogu prus antigu chi tenimus: est de su perìodu de su paleolìticu, e s’assimigiat a unu giogu chi fàbricant galu oe sos pitzinnos eschimesos.

In sas tumbas de s’Egitu antigu b’ant àpidu animaleddos de terra luzana e de linna postos subra rodas, chi rapresentant cocodrillos o gatos chi aberint e serrant sa bucca, e buratinos chi podent mover bratzos e cambas.

Fintzas in su tempus de sos Romanos e de sos Grecos antigos sos giogos esistiant, e nos nd’at arribadu rasta: ischimus dae sos repèrtos archeològicos e dae sas pituras chi a sos pitzinnos lis piaghiat a giogare cun sas bardòfulas, cun sos balla-balla (sos pitzinnos prus pòberos si los faghiant de rochetes de linna) e a sas fèminas cun sas pipias (issas lis naraiant pupae o puppiae).

Sas pipias prus antigas sunt de su 2000 in antis de Gesu Cristu. Fiant fatas de avoriu, de linna o de terra luzana. Ma sas prus connotas sunt sa pipia de Crepereia Tiophaena chi est in sos Museos Capitolinos, e cussa de sa Vestale Cossinnia chi est in su Museu Natzionale Romanu. Ambas pipias podent mòvere bratzos e cambas e faghet fintzas a las bestire (comente a sa  Barbie de oe).

A sos pitzinnos òmines, in sa Roma antiga, lis piaghiat a si fàghere carreddeddos e a fàghere sas garas de cursa prendìndelos a sos sòrighes.

In sa pitura e in s’iscultura de totu sas tziviltades antigas b’at imagines de pitzinnos chi si divertint cun giogos chi sunt arribados finas a su tempus nostru: a cua-cua, a tènnere, a tirare sa fune, a cùrrere cun cadditos de canna… Dae su tempus de sos Romanos nos est arribadu puru un àteru giogu chi faghimus galu: su giogu de sa Murra (sos Romanos li naraiant Micare digitis).