No esistit un'istòria iscrita de sa bidda de Orane, mancari chi Orane siat istada pro sèculos meda, dae su 5oo a s'incumintzu de su 800, su tzentru de su Marchesadu omònimu.S'insediamentu umanu est antigu meda, comente si bidet in su territoriu comunale suo e finas in s'insediamentu urbanu de oe. Difatis sunt istadas agatadas medas monetas romanas, oe cunservadas in su Museu Archeolòzicu de Nùgoro e finas repertos nuràzicos e posteriores. Totu a inghìriu de sa bidda sa presèntzia nuràzica est manna a beru; difatis, in su territòriu comunale b'at restos de ses villàzios nuràzicos e 21 restos de nuraghes isolados. B'at finas medas costrutziones de caratere reliziosu: 8 crèsias in intro de sa bidda, 12 logos de cultu e interru, 8 crèsias campestres e 3 restos de crèsias antigas. S'istòria de su Marchesadu de Orane cumintzat cun s'istitutzione sua, fata cun unu decretu reale. A pustis fiat istadu dadu in fèudu a sos Carroz a pustis de sa bintòria issoro in sa batalla de Macumere. Sa Curatoria de Dore e sa de Bitzi fiant istadas reunidas e dadas, cun sa càrriga de Vitzerè a Pietro II Maza de Licana, maridu de Beatrice, fiza de Nicolò Carroz, mortu in su 1479. Est gasi chi si definit sa dimensione territoriale de su Marchesadu de Orane chi at a fagher s'istòria de sa bidda finas a sa metade de su sèculu coladu. Su 1843 sinzat sa fine de su Marchesadu de Orane, ca su Duca de Hygraz, s'ùrtimu Marchese, lu tzedet a su fiscu de su Rennu de Sardinna cunzende unu periodu istòricu chi at dadu a Orane unu ruolu de protagonista in s'istòria feudale de sa Barbàzia e de sa Sardinna. S'istòria de su Marchesadu no est, semper e cando, s'istòria de Orane. Sas chircas non sunt fàtziles, ca a pustis de sa segunda gherra mundiale est istada pèrdida sa documentatzione chi fiat in s'ex cumbentu de sos Frates Minores e in sa caserma de sos carabineris. Sunt essidas dae pagu unas cantas òperas chi faeddant de su Cumbentu de sos Frates e de su Santuàriu de su Monte de Gonare, ma non b'est galu una bisione cumpreta de s'istòria de Orane. Su territòriu atuale de Orane est su resurtadu de su sincretismu chi b'est istadu in totu sa Sardinna, cun s'iscumparta de medas biddas e s'unione issoro a sas tzitades prus mannas.