Cando siat nāschida sa bidda de Bitzi galu non s'ischit. Si podet narrer chi s'istoria l'at bista colare dae esser unu tzentru riccu e popolosu a esser vivida oe dae pacas pessones, unas 3500. Mancari minoredda, Bitzi, diat esser, pro sos istranzos, unu bellu logu de bisitare....B'amus unu situ archeolōgicu "ROMANZESU", b'amus meda agriturismos uve si podet colare sa die e connoscher menzus sa campanna, e b'amus finas unu albergo intro e bidda intunnatu dae pinos e dae su birde de sa natura.
Sunt meda sas ocasiones chi s'istranzu si podet acapitare pro venner a bisitare sos bitzichesos: a aprili, su 23, bi faghimus sa festa de su patronu, Santu Jorgi, chi venit preparada dae sos pitzinnos chi ant 25 annos. Sos festegiamentos durant tres dies e sa cosa prus bella de abaitare est sa pratessone de sos costumes bitzichesos e de āteras biddas puru chi si achet semper su 23 a bortaedie.
Cussa chi est cussiderada sa festa manna est sae sa Madonna de su Merāculu, chi rughet su 30 de Cabudanni. A custa festa bi venint meda pessones a pede dae sas biddas a curtzu. Si narat chi custa Madonna apat fatu mirāculos e dae cussu sa zente li pedit carchi gratzia e faghet sa promissa de venner a pede si su chi at dimmanatu a sa Madonna li venit datu. Finas in custa esta si faghet sa pratessone, ma a diversu de Santu Jorgi sa Madonna venit picada dae su carru de sos boes.
Si podet narare chi Bitzi est una Bidda de cresias. Cresias de campanna bi n'at chene contu. Sunt totus meda anticas e bellasmeda e cun su tempus sunt restadas semper uguales. B'est sa cresia de Santu Jorgeddu de Dure, chi est subra de una collina e chi si narat diat esser su logu uve prima b'it una bidda chi est istada a pustis isperdida dae sa pesta, e de custa bidda bi diat esser restada duncas solu cussa cresia.
A curtzu b'at āteras cresias minoreddas, che a sae Santu Istčvene, Santa Maria e Babbu Mannu. Prus a largu, ma semper a curtzu a bidda nche sunt in betze Sant'Elia, Bonaera e Bonu Caminu. Chene irmenticare Santu juanne, Santu Matzeu e S'annossata. Mancari sas traditziones siant difitziles a mantenner est bellu a poder narare chi in sa die de su Santu, in custas cresias venit galu fata sa festa: su pranzu pro totus sos bitzichesos chi ant in cussa die s'ocasione de istare totus colluidos.