Su Carignanu Su Carignanu, pro sa produtzione sua, si classìficat a su de tres postos intre sas uas rujas coltivadas in Sardinna. Sa bide est presente in binzas ispetzializadas allevadas a Ispalliera o a Arburedda, o est impreada pro integrare àteras coltivatziones de uas rujas. Sa produtzione de custu binu tìpicu est belle totu cuntzentrada in sa localidade sarda prus antiga fundada dae sos Fenìtzios, su Sulcis, in sa Sardinna sud-otzidentale.

Sa resistèntzia de su Carignanu a sos bentos salsos, chi benint dae su mare, at cunsentidu chi s'isviluperet sa coltivatzione mescamente in s'ìsula de Santu Antiogu e de Santu Pedru, in ue si podent agatare estensiones mannas de binza. Non s'ischit bene dae ue siat arribada custa "cultivar" a Sardinna, ma sos prus sunt de acordu a pensare chi siat orizinària de Carifera in s'Aragona, e petzi a pustis esportada a sas provìntzias marìtimas de sa Frantza meridionale, Algeria, Tunisia, e duncas a Sardigna. Reconnotu in su 1977 comente binu a Denominatzione de Orìgine Cuntrollada, est cumertzializadu suta de su nùmene de "Carignano del Sulcis". S'aplicatzione de sas tècnicas de produtzione prus modernas at fatu de custu binu unu produtu chi agradat e est chircadu meda, mescamente si li dant unu perìudu de afinamentu in sas ampullas.