Su Torbadu

Sa bide a pupujone biancu Torbadu, presente in Sardigna petzi in sa zona de s'Alighera, subra de una superfìtzie de pagu prus o mancu de 90 etaras, est de seguru de òrigine ispannola, importadu durante sa dominatzione catalana. Custa òrigine est finas rilevada in su catàlugu de su vivàiu de Villa d'Orri, creadu dae su Marchesu Manca de Villahermosa, in ue custa bide est inditada comente Vitis ibèrica e cun sos nùmenes locales de àghina catalana o Turbat.
Sa bide Torbadu est vinificada a sa sola pro otènnere su binu omònimu e comente base pro unu binu ispumante brut bonu meda, ambos inseridos in sa DOC de s'Alighera.