Sa cunservatzione
Sa segunda fermentatzione, chi est prus pagu evidente, durat a pustis de s'isbinadura finas a cando su binu no est sicu: custa est sa fase de sa maturatzione, chi tenet una durada diferente e chi, si est fata dae unu binu ruju in intro de cubas de linna, si narat imbetzamentu.
A pustis, in sas ampullas, su binu sighit a s'afinare in su nuscu e in su gustu, ma pro abarrare bonu tocat de l'atèndere finas in custa fase,  e faghende travasos e colmaduras
  • TRAVASOS    Cun sos travasos s'èvitat sa formatzione de fragos malos e si faghet aerare sa massa de su binu. Si faghent a fine de Santandria, de Nadale, de Freàrgiu e de Abrile e cumbenit a los fàghere in dies pasadas e assutas. Bi sunt duas maneras de los fàghere: a s'àera  (s'aberit sa vàlvola superiore e si dassat calare su binu in unu mastellu dae ue cun una pompa si mandat a unu istèrgiu netu e solfitadu); sena àera (cun una pompa si ponet su binu in unu istèrgiu bene solfitadu. Sos tubos de sa pompa sunt ambos cullegados a sas vàlvolas inferiores de sos duos istèrgios: gasi s'àera non tocat su binu)
  • COLMADURAS   Cando arrivat s'ierru su volùmene de su binu calat. Pro curpa de custu calu su binu est espostu a s'efetu dannosu de s'àera. Pro custu ògni 10 dies si devent mantènnere prenos sos istèrgios in ue est su binu agiunghende àteru binu de sa matessi calidade.
Si su binu est unu ruju, unu biancu o unu rosadu prontu a bufare si ponet in sas ampullas in beranu e si devet bufare intro de s'annu. Si est imbetzes unu binu ruju corposu devet imbetzare in intro de cubas de linna. S'imbetzamentu podet durare dae 3 meses a 3 annos.