Sa catzigadura

A pustis de sa  binnenna est de importu mannu a catzigare  s'àghina deretu. B'at gente meda chi isseberat sos pubiones dae su tenàghe pro no l'istrecare paris ca diat irranchidare su binu.


Sa màchina pro catzigare prus cumuna in sos mangasinos sardos est cussa a rullos chi podet tènnere finas su sistema pro isseberare sos pubiones dae s'iscoba. Subra de sos rullos tenet una tramògia de ferru ismaltadu o de atzàrgiu dae ue s'àghina  falat pro sa fortza de gravidade. Suta de sa màchina b'at una vasca de regorta o su cubone.
Non tocat de samunare s'àghina in antis de la catzigare, pro ite gasi si nche diant  catzare totu sos lièvitos chi servint a sa fermentatzione arcòlica.
A su mùstiu  s'agiunghet  su metabisolfidu e si detèrminat sa gradatzione tzucarina.  A pustis, cun sas pompas (manuales o elètricas) si aspirat su mustiu a sos istèrgios de fermentatzione. Sas pompas impreadas pro custu traballu devent èssere autoadescantes e a su sòlitu sunt a pistone cun una vàlvola a palita, in neoprene.
Sos  istèrgios
Sos istèrgios pro sa preparatzione de su binu sunt de castas diferentes.
Bi sunt cussos addatos pro sa fermentatzione, chi sunt sos cubones (de linna o de vetrorèsina), sos cubones-serbatoju (de linna o de vetrorèsina) e sas domigianas (petzi de bidru); e cussos addatos pro sa cunservatzione, chi sunt sos tinos-cuba (de linna), sos semper-prenos (de vetrorèsina o de atzàrgiu), sas cubas (de linna) sos serbatojos (de vetrorèsina o de atzàrgiu) e sas domigianas (de linna).