Thiniscole est su tzentru prus importante de s'arta Baronia; su de duos de sa Provìntzia de Nùgoro. A su 31/12/05 contat 11.256 abitantes, suta 18 annos sunt unos 2.000, subra sos 60 unos 1.500. Bi sunt finas 200 istranzos, cosa chi diat poder creare un esempru de interscàmbiu: intre sa cultura sarda e sas istranzas (Africanas, Cubana e de àteros Paisos Europeos). Sa bidda est situada in paris, suta de sos pees nord-orientales de su Monte Arvu, a unu livellu de 40 metros subra de su mare. Su territòriu thiniscolesu est mannu 199,96 kmq, duncas belle che 20 miza ètaros. Montes, seddas, pianos a curtzu de padentes de pinos, ispiazas de unu arvu chi azegat, cun unu mare incontaminadu, totus faghent de su territòriu de Thiniscole un'àrea naturale de interessu mannu.
Sa cosas de fagher sunt meda:

• Passizare in sas àndelas de monte
• Fagher su bagnu in su mare trasparente
• Fagher bìsita a sos pastores chi traballant su casu e a sos artizanos chi manizant sa zeràmica.

A Thiniscole si podet arribare dae Casteddu, Tàtari, Terranoa e dae Nùgoro biazende in sa S.S. 131 bis. Pro chie isbarcat a Arbatax, si podet pigare sa S.S. 125, connota comente "orientale sarda". Su territòriu cumonale de Thiniscole, interessante meda pro su paesazu e pro s'ispeleolozia, s'isterret dae su Monte Arvu
finas a sas ispiazas de Bèrchida,Sa Calitta, Santa Lughia e Capo Comino. Sa bidda mantenet galu, in unas partes, sa ghiza de s'istare antigu. Oe Thiniscole est una bidda manna, diventende gasi su capulogu de sas Baronias. Su paesazu mantenet sos sinnos de sas atividades de su tempus coladu, s'agrìcula e sa pastorale. Dae sos pees de su Monte Arvu a sas seddas, intre sos ortos, sas binzas e sa flora mediterranea, bi sunt aziendas agrìculas e agriturismos meda. Ma sa vocatzione turìstica prus manna benit dae su mare, cun 25 km de costera:

• Sa Calitta, tzentru balneare, postu de portu turìsticu cun banchinas atrezadas e serbìtzios turìsticos meda;
• Santa Lughia, biddighedda de piscadores;
• Capo Comino, cun sas dunas de arena mannas meda, e sas rocas de su faru;
• Bèrchida, cun s'ispiaza de arena arva meda, prus bortas premiada.

In sos montes si podet agatare ambientes agrestes: in su calcare de Monte Arvu b'at su fenòmenu de su carsismu, custu at creadu fraturas meda. Numerosas peri sas grutas, importantes dae s'ala ispeleolòzica e archeolòzica. Si agatat finas unas padendes demaniale: su ghinìperu, su mudegru, s'aliterru, sa chessa, sa murichessa, su lidone; sas prantas tìpicas de sa màchia de costera, arziende de quota, (finas a sos 800 metros) lassant a pagu a pagu su logu a su chercu e lisandru. In su Monte b'at, pro sa fàuna: sirbones, ghurpes e grassiles; s'abbile reale, s'àstore, s'àstore marinu e àteros puzones. Su Monte Arvu si podet bisitare pro s'escursionismu, in sas àndalas, siat a pee chi cun sa bitzicleta.

Su territòriu tenet unos cantos albergos, campezos, letu e prima colatzione, agriturismos e domos meda de afitare.

De bider sunt:

• Villazu nuràzicu de "Luthutai"
• Gruta funerària de "Cùccuru de Jana"
• Gruta de "Elene Pòrtiche" e de "Sa Prejone e s'Orcu"
• Villazu artumedievale de "Rempellos"
• Turre Aragonesa de S. Lughia
• Crèsia Parrochiale de S.G.Battista (sec. XVIII)
• Festa de S. Antoni su 16 e 17 de Ghennarzu, cun "s'olone"
• Sa Chida Santa
• Festa de S. Iacu su 1 de Maju
• Festa de N.S. de Fàtima (a Sa Calitta sa 2° domìniga de Maju)
• Festa de S.G.Battista su 24 de Làmpadas, cun "s'oloneddu"
• Festa de S.Elene in Austu
• Festa de N.S de da Salude in Cabudanni
• Festa de Sas Grazias sa 2° domìniga de S.Gaine