Su Redentore rapresentat una intre sas manifestatziones prus  sugestivas e sacras de sa Sardigna. Sa prima editzione est de 1900 cando, pro tzelebrare solennemente su cumintzu de su  sèculu 20 de s'era cristiana, fiat innaltzada in sa punta de su Monte Ortobene un’ istatua manna de brunzu rapresentat su Redentore, devennida a pustis logu de devotzione pro pellegrinos medas. Sa sugestione de sa festa aumentat cun s’isfilada de costumenes sardos. Unu corteo mannu partit da sa tzitade a s’arbeschida, e protzedet a passu lentu e cumpostu, cadentzadu dae sas notas de sos innos litùrgicos e, percurrende caminos presentes in sos padentes, s’arribat a sa punta de su monte. Suta de s’istatua benint tzelebradas sas missas e si faghent sos ritos traditzionales. Su programma de sa Sagra comprendet initziativas diferentes:ballos, cantos e sonos chi durant pro totu sa die, totus a largu dae su monte cun s’intentzione de rispetare sa sacralidade de su logu.